بشري تحيي ذكرى شهدائها على مذبح النصب التذكاري لشهداء المقاومة اللبنانية المسيحية
أحيت القوات اللبنانية بشري ذكرى شهدائها في قداس احتفالي اقيم على مذبح النصب التذكاري لشهداء المقاومة اللبنانية المسيحية عند المدخل الشرقي لمدينة بشري بعد وضع اكليل من الغار على وقع ترنيمة” وحياة يلي راحو” وترأس القداس الخوري شربل مخلوف بمشاركة المونسينيور يوسف فخري والخوري بول مراد والأب المدبر طوني فخري وبحضور رئيس جهاز الشهداء والمصابين والاسرى في الحزب شربل ابي عقل، رئيس مركز بشري رينيه نجار، رئيسة جهاز المرأة في المركز عبير عمانوئيل وحشد من أهالي الشهداء وشباب بشري. وخدمت القداس جوقة صدى قنوبين.
وبعد تلاوة الإنجيل المقدس ألقى الخوري مخلوف عظة تحدث فيها عن المقاومة المسيحية عبر التاريخ مرورا بالقديس يهوذا مرورا القديسة شمونة والشهداء المسابكة وصولا الى البطاركة الذين قاوموا استشهدوا رافضين التخلي عن ايمانهم مدافعين عن حريتهم وعن أرضهم وتابع: تشبثوا بايمانهم بهذه الأرض وربحوا الاغليين اللذين تكلم عنهما المثلث الرحمات البطريرك صفير حين قال”:لقد لجأنا الى هذه الأودية لنربح الاغليين الحرية والإيمان فإن عدمنا احداهن عدمنا الحياة”. فنحن شعب رسالته وتاريخه للحرية لان الرب حررنا من عصور الظلمات وعصور الاحتلالات والوصايات التي رفضها ابن بشري المقاوم عبر التاريخ ورفع رأسه شامخا بوجه كل من تطاول على بلدنا وعلى وجودنا وكياننا وها نحن باقون لان الرب حي وهو معنا، وهنا يوجد اناس أبطال لا يخافون الموت في ساحات الشرف لانه تسبيح دائم في السماء.
لذلك نحن نذكر في هذا القداس المبارك شهداء بشري عرين المقاومة عرين المارونية عرين أرض القديسين، أرض الشموخ، أرض الارز الخالد ولان الشهادة رسالة وجود واستمرار للحياة وتغيير لكل ما هو من خنوع وذل ونبقى هنا اقوياء اوائل في بلدنا لننتصر ونستمر مقومين مدافعين ثابتين بايماننا وبارضنا.
لذلك وأمام هذا النصب الذي يرمز المذبح فيه الى الشهادة بإختيار كلي خصوصا واننا مدينة بشري لم تشهد اية معركة إنما كانت دائما تدافع وتقاوم بصلابة أمام المتراخين لذلك استحقت ان تكون مدينة الشهداء المذبح يرمز عند مدخل بشري الشرقي الى شهادة من قدموا أنفسهم مؤمنين بأن ما من حب أعظم من ان يبزل الإنسان نفسه عن احبائه، وخلف المذبح إحدى عشر عامود من حديد يرمزون الى عدد سنوات اعتقال ابن بشري البطل سمير جعجع خرج بعدها الى الحرية بكرامة وعزة بالجبين العالي لان الشرف والخلق السامية تنبع من الايمان بالله خلصنا يسوع المسيح الذي دحرج الأب والروح القدس الحجر عن باب قبره وخرج بالنور ومنح الذين آمنوا به النور الازلي وبتنا ابناء الحياة وقلوبنا مرتفعة الى الله
وختم مشيرا الى ان المستشرقين اشتروا الى ان عدد المذابح في بشري يساوي عدد ايام السنة والصلبان تكلل جبالها ومع هذا المذبح الجديد باتت تزيد عن عدد ايام السنة اما الادراج التيتسمو صعودا فتبلغ ٣٣ درجة رمزية عمر المسيح التي كللت بالصليب بالارتفاع ونحن قياميون فلتكن افكارنا وقلوبنا وعقولنا مرتفعة فاعتز يا ابن بشري يا ابن المقاومة المسيحية وارفع راسك وافتخر بالإيمان، هذا تاريخنا وها نحن اليوم مستمرون دائما مسبحين مقاومين ثابتين مدافعين عن هذه الأرض أرض الشهادة والابطال، فتحية اكبار لكل شهداء بشري ولكل شهداء المقاومة اللبنانية المسيحية،فيا رب كللهم بالمجد لانك الله المجد لك التسبيح آمين.
وكان القداس استهل بكلمة للشاب رالف شويري من كلمات نزيه الحاوي جعجع قال فيها :يا جرح الماضي الذّي يسقي الحاضر ، يا قمح البيادر المذهّب.
يا بخّور الآلهة والقدّيسين.
جبلتم تراب الوطن بنزفكم وغزلتم من الغار تاج الزّمان.
يا زهرةً بريّة قطفها القدّيس يوسف وقدّمها للعذراء مريم عربون المحبّة والإحترام .
أيّها الشّهداء الأبطال …تركتم وراءكم خميرة مقدّسة وأصبحت هذه الخميرة عجيناً وخبزاً يقتات منه طلّاب الحريّة في بقاع الأرض. تركتم وراءكم أشبالاً كبروا وهم الآن يحملون مشعل الحريّة ورمح المقاومة.
يا من سكنتم البال واستوطنتم التّاريخ. صليبكم سيبقى مرفوعاً، وسيبقى أرزكم أخضر وبخّوره يعبق في عمق وادي القدّيسين.
حملتم السّلاح وكنتم الأبطال … وليس كلّ من يحمل السّلاح بطل. سلامٌ عليكم …سلامٌ لكم ..
اما النوايا فقد قدمتها اولا الشابة ماريا جعجع فقالت: “ما من حب أعظم من أن يبذل الإنسان ذاته في سبيل من يحب”
شهدائنا كرّسوا حياتن للوطن يلي حبّوا لدرجة يستشهدوا كرماله…
ونحنا اليوم لح نبقى أوفياء لإلن واجتمعنا بهالقداس تنصلّي لراحة أنفسن…
منطلب منّك يا رب تعبّينا من القوة والفكر والروح يلي كان عندن ياهن تنستاهل نحمل الشعلة من بعدن…
ساعدنا تنخلّي وطننا يتخطّى الأزمات يلي عم يقطع فيها ويوصل يصير لبنان يلي بيليق فينا ويلي شهدائنا حلموا فيه واستشهدوا كرماله…
منك يا رب منطلب والك منصلّي.
اما النية الثانية فقدمتها الشابة جويا طوق قائلة: منحط بين ايديك يا رب ضيعتنا بشرّي.
هالضيعة يلي قدّمت شهداء بكل بقعة من هالوطن بس تيبقى الوطن.
هالضيعة يلي مرق عليها كتير بس ضلّت واقفة وصامدة بوجه كل شي.
كيف؟
لأن قدام كل مشكلة أهلها بيتوّحدوا تيواجهوا سوا ايد بايد.
منطلب منك تزيدنا من هالروح الحلوة وما تخلّي ولا شي يفوت بيناتنا.
احمي ضيعتنا من كل شر معقول يدق فيها وازراع الأمان والسلام بيناتنا.
كون المرشد لعيالنا تيضلّوا متماسكين، ولولادنا تيكونوا ولادك، ولشبيبتنا تيمشوا عطريقك ويتركوا كل شي ببعّدن عنّك.
قرّبنا كلّنا أكتر عبيتك وقوّيلنا ايماننا فيك أكتر وأكتر.
منك يا رب منطلب والك منصلّي.
والنية الثالثة للشابة ريتا كيروز وفيها: منصلّيلك اليوم يا رب عنية وطننا الحبيب لبنان يلي عم يقطع هلق بأصعب فترة بتاريخه.
كون إنت السند والقوة لشعبنا تيتجاوز هالمحنة.
احمي شبابنا وازراع الأمل بقلوبهن وساعدن يضلّوا متمسّكين بأرضن رغم كل شي.
منصلّيلك كمان عنية كل شخص عم يعطي كل شي عندو تيساعد وطننا، إن كان بقلب لبنان أو بالإغتراب.
ومن خص بالذكر، حزب القوات اللبنانية برئيسه وكل شخص وفريق عمل بقلبه.
إنت يا رب احميهن واعطيهن قوّة أكتر وأكتر تيضلّو، متل ما كانوا شهدائنا، راس حربة بوجه كل حدا ما بدّو يانا نوصل للبلد يلي بيشبهنا.
منك يا رب منطلب والك منصلّي.
وفي ختام القداس تم توزيع تذكارات المناسبة والقى الشاب شربل فخري كلمة شكر قال فيها : وطننا يلي إسمو لبنان، وطن بعمر الكون…
وطن انذكر بالكتب المقدسة…
وطن هوّيتو بعدا متل ما هيّ رغم كل يلي جرّب يغيّرها…
وطن يلي بعدو واقف وصامد قدام أكبر الأزمات…
صامد لأن بقلب العتمة يلي محاوطته في نجوم بعدها عم تضوي…
هالنجوم هنّي كل شب وصبية عم يعطوا كل شي عندن لخدمة القضية بحيلّا طريقة…
هالنجوم هنّي كل حزب القوات اللبنانية، يلي ما بيوم تخلّى عن قضيتو ومبادئو لو قد ما شتدت المصاعب…
هالنجوم هنّي ال 15434 شهيد يلي لولاهن ما كنّا هلق هون…
منشكرك يا رب عكل نجمة من هالنجوم…
منشكرك عالشباب والصبايا يلي متمسكين بحب وطنن رغم كل شي…
منشكرك عحزب القوات اللبنانية يلي وجودو عاطينا الأمل بوطننا بظل كل الأزمات يلي عم يشهدها…
منشكرك عكل شخص حامل قضية هالوطن، من كل شهيد قدّم حياتو لكل محارب لولا تضحياتو ما كنّا هون لكل شب وصبية عم يعطوا من وقتن اليوم…
منشكرك عكل شخص حامل عكتافو هموم الناس ومكرّس كل وقتو تيساعدن يتجاوزوا هالفترة الصعبة…
منشكرك عكل شخص لولا مساهمته ما كان صار هالنصب هون اليوم، ان كان مساهمة مالية أو مادية أو معنوية أو أيًّا كان…
منشكرك عوطننا رغم كل المشاكل يلي عم يقطع فيها…
منشكرك لأنك عم تساعدنا نحافط علبنان يلي بيشبهنا ويلي نحنا بدنا ياه…
منشكرك لأن عم تعطينا أكتر من فرصة نشارك بنهوض بلدنا…
إلك الشكر والمجد من هلق وللأبد. آمين.
